Horario: De 10:00 a 14:00 h / 16:00 a 20:00 h Pago: Tarifa completa Tipo de acceso: Restrinxido Prezo: 2,40

rec.mon3@escolapios.es

 

O Colexio de Nosa Señora da Antiga denominado o "Escorial Galego" e coñecido popularmente como o do Cardeal ou a Compañía, foi construído entre finais do século XVI e principios do XVII, baixo patrocinio do Cardeal Rodrigo de Castro co obxectivo de que, rexentado pola Compañía de Xesús, servira para a educación da bisbarra e de toda Galicia. Desde o ano 1873 son os PP. Escolapios os que dirixen o colexio.

O conxunto monumental, situado ante unha gran explanada no centro de Monforte, está formado polo edificio do colexio coa fachada de estilo renacentista herreriano, a Igrexa de Nosa Señora da Antiga, o claustro e o museo. A igrexa é de planta de cruz latina e levántase no centro do edificio. A nave central remata en bóveda de canón con casetóns e no cruceiro érguese unha gran cúpula rematada en lanterna.

A Igrexa alberga importantes obras de arte das cales destacaremos o retábulo maior feito en madeira de nogueira por Francisco de Moure a comezos do século XVII e a estatua do cardeal Rodrigo de Castro fundida en bronce, obra do escultor Juan de Bolonia.

O Museo, instalado na antiga sancristía conta cunha pequena colección de pezas doadas polo Cardeal entre as que poden verse documentos, ornamentos litúrxicos, etc. Pero a maior xoia do museo é a súa pinacoteca  con obras clave da historia da arte, referímonos ás pinturas de El Greco e Andrea del Sarto.

De El Greco son as obras Aparición a San Lourenzo da Virxe co neno e San Francisco de Asís e Frei León meditando sobre a morte de finais do século XVI.
De Andrea del Sarto hai cinco obras: San Pero coa chave, San Xoán Bautista, Santa Margarita de Cortona, Santa Catarina de Alexandría e Santa Inés, todas elas da primeira metade do século XVI.

 

 

 

 

OUTROS DATOS
Enderezo
P.P. Escolapios. Rúa Campo da Compañía, 50.  
27400
Monforte de Lemos
Tlf : 982400450
Observaciones:
Visita guiada previa cita